Një rrjet i dyshuar i trafikimit të emigrantëve, që vepronte në Ballkan, është goditur gjatë një operacioni të koordinuar nga autoritetet e Greqisë, Bullgarisë, Holandës dhe Rumanisë, me mbështetjen e Europol. Si rezultat i aksionit janë arrestuar shtatë persona.
Sipas Europol, operacioni u zhvillua më 16 korrik në Selanik, Athinë, Sofje, Bukuresht dhe Etten-Leur në Holandë. Pesë persona u arrestuan në Greqi, një në Bullgari dhe një në Holandë.
Hetimet janë përqendruar te një grup i organizuar, i përbërë kryesisht nga shtetas sirianë dhe egjiptianë, i dyshuar për organizimin e transportit të paligjshëm të emigrantëve nga Greqia, përmes Bullgarisë dhe Rumanisë, me destinacion përfundimtar Italinë.
Sipas autoriteteve, emigrantët ishin kryesisht shtetas egjiptianë, irakianë dhe sirianë. Ata transportoheshin fillimisht me automjete të vogla nëpër Ballkan dhe më pas transferoheshin në kamionë për segmentin e fundit të rrugës drejt Italisë.
Grupi dyshohet se përdorte automjete me qira, makina të regjistruara në emër të personave të tretë ose kompanive fiktive, si edhe automjete të vjedhura, kryesisht në Greqi. Hetuesit bëjnë me dije se automjetet me qira siguroheshin duke përdorur dokumente identifikimi të vërteta dhe të falsifikuara, ndërsa më pas nuk ktheheshin.
Deri më tani, autoritetet e lidhin këtë rrjet me 12 raste të trafikimit të emigrantëve të regjistruara nga shkurti deri në korrik 2026, ndërsa katër raste të tjera të mëparshme vijojnë të jenë nën hetim.
Europol njoftoi se gjatë operacionit ka koordinuar shkëmbimin e informacionit mes vendeve pjesëmarrëse dhe ka dërguar në Greqi një ekspert me një zyrë të lëvizshme për verifikime në kohë reale në bazat e të dhënave të agjencisë.