Roma nuk do të ketë mundësinë të presë festivalin evropian të këngës Eurovision për vitin 2022.
Kompeticioni prestigjioz i këngës që u fitua nga grupi i njohur italian, Maneskin vitin e kaluar do të mbahet në Itali, por jo në “qytetin e përjetshëm”, siç ishte parashikuar më herët.
Motivi është se nuk ka ambientin e duhur për të pritur një ngjarje të tillë kaq madhështore.
Kështu, pas shumë përpjekjesh dhe propozimesh është arritur në përfundimin se do të jetë Torino që do të organizojë “Eurovision Song Contest” për vitin 2022. Zyrtarizimi pritet në orët në vijim.
Autoritetet lokale në Romë kishin propozuar Pallatin e Sportit si vendin ku mund të organizohej “Eurovision 2022”, por teknikët e EBU që merren me organizimin e eventit refuzuan duke thënë se nuk përmbushte disa nga kushtet e nevojshme.
Kujtojmë se fituesit e vitit 2021 të Eurovision-it tërhoqën shumë vëmendje. Përveç këngës e cila u pëlqye aq shumë sa njerzëve u lindi dëshira për të mësuar italishten, grupi tërhoqi vëmendjen dhe për stilin e tyre, e sidomos për vokalistin kryesor Damianon.
Maneskin, u kthyen në një grup me famë botërore dhe filluan të japin koncerte e intervista në mbarë globin.
“Rroku nuk vdes kurrë”,- është motoja e tyre.