Eurovision 2027 do të zhvillohet në qytetin bregdetar bullgar të Burgasit, pranë Detit të Zi, nga 12 deri më 15 maj, kanë konfirmuar Unioni Evropian i Transmetimit (EBU) dhe Televizioni Kombëtar Bullgar (BNT).
Konkursi, së bashku me provat, gjysmëfinalet dhe finalen e madhe, do të mbahet në Arena Burgas, impianti më i ri sportiv dhe argëtues i vendit, i hapur në vitin 2023.
Bullgaria do të presë Eurovisionin pasi këngëtarja Dara triumfoi në edicionin e vitit 2026 në Vjenë, duke i siguruar vendit fitoren e parë në historinë e konkursit me këngën “Bangaranga”.
Drejtori i Festivalit të Këngës në Eurovision, Martin Green, tha se EBU është “e kënaqur” me zgjedhjen e Burgasit, duke theksuar se qyteti do t’i japë konkursit një identitet të veçantë.
“Burgasi është një qytet i gjallë dhe mikpritës në Detin e Zi, me një identitet të fortë muzikor dhe kulturor, si dhe me infrastrukturën dhe kapacitetet e nevojshme për të mirëpritur familjen e Eurovisionit”, tha Green.
Sipas tij, synimi është që edicioni i parë i Eurovisionit në Bullgari të ndihet “vërtet bullgar”, por në të njëjtën kohë të mbetet një spektakël tipik i Eurovisionit, që bashkon njerëzit përmes muzikës.
Pse u zgjodh Burgasi dhe jo Sofja?
Zgjedhja e Burgasit mund të jetë surprizë për disa ndjekës të konkursit, pasi kryeqyteti Sofje ishte konsideruar fillimisht si një nga destinacionet kryesore.
Në fazën përfundimtare të procesit konkurrues të përzgjedhjes mbërritën Burgasi dhe Sofja, ndërsa ofertat fillestare përfshinin edhe Varnën dhe Plovdivin.
Sipas EBU-së, Burgasi u përzgjodh për propozimin e tij të përgjithshëm, duke kombinuar kapacitetet e Arenës, infrastrukturën teknike, hotelet, transportin dhe lidhjet ndërkombëtare.
Drejtoresha e BNT-së, Milena Miltenova, tha se është e bindur se Bullgaria do të jetë një mikpritëse e denjë dhe do të prezantojë kulturën, mikpritjen dhe profesionalizmin e saj para miliona shikuesve në mbarë botën.
Kryetari i bashkisë së Burgasit, Dimitar Nikolov, e cilësoi organizimin e Eurovisionit si një “nder të jashtëzakonshëm” për qytetin.
Organizatorët presin gjithashtu një ndikim të rëndësishëm ekonomik. Sipas EBU-së, Liverpooli përfitoi rreth 66 milionë euro nga organizimi i Eurovisionit në vitin 2023, ndërsa Malmö gjeneroi rreth 40 milionë euro në vitin 2024 dhe Bazeli rreth 58 milionë euro në vitin 2025.
Në prag të edicionit të ardhshëm, Eurovisioni ka ndryshuar gjithashtu rregullat për vendin që fiton konkursin.
Sipas rregullores së re, nëse një shtet që ndodhet në një konflikt të armatosur fiton Eurovisionin, ai nuk do të jetë automatikisht i kualifikuar për ta organizuar konkursin vitin pasardhës.
I njëjti kufizim do të zbatohet nëse një “situatë e ndjeshme gjeopolitike” prek sigurinë, mbrojtjen ose stabilitetin e shtetit fitues apo të rajonit të tij të afërt.
Ndryshimi është parë gjerësisht në kontekstin e debatit për pjesëmarrjen e Izraelit, mes kritikave ndërkombëtare për operacionet e tij ushtarake në Gaza dhe Lindjen e Mesme.
Pavarësisht protestave dhe thirrjeve për pezullimin e Izraelit, përfaqësuesi i tij, Noam Bettan, u rendit i dyti në Eurovision 2026 me këngën “Michelle”, duke shënuar vitin e dytë radhazi që Izraeli përfundon në vendin e dytë.
Megjithatë, rregulli i ri nuk prek vetëm Izraelin. Ai mund të ketë pasoja edhe për Ukrainën, e cila është përfshirë në luftë që prej pushtimit rus në vitin 2022.
Ukraina fitoi Eurovisionin në vitin 2022 me Kalush Orchestra, por për shkak të rreziqeve të sigurisë, konkursi i vitit 2023 nuk u zhvillua në Kiev. EBU vendosi që organizimi të zhvendosej në Mbretërinë e Bashkuar, ku Liverpooli priti edicionin e vitit 2023.
Me Burgasin si qytetin pritës, Eurovision 2027 pritet të sjellë një spektakël të madh në brigjet e Detit të Zi dhe t’i japë Bullgarisë një mundësi të rëndësishme për të promovuar kulturën dhe turizmin e saj para një audience globale. A.K.