Rrëfimi
Si e kujtoni jetën tuaj të hershme, fëmijërinë? Ju jeni larguar 9 vjeç. Ç’ gjurmë la Kosova në atë çka do të ndodhte më pas me ju dhe në jetën tuaj në Amerikë?
Kam pasur një fëmijëri të bukur, me kujtime shumë të bukura dhe i rrethuar me shumë dashuri. Këto ndjenja të bukura i kam marrë me vete në artin e fotografisë duke vendosur në pah të bukurën.
Fadil, ju keni punuar në shumë panaire të modës duke promovuar fushata për markat globale. Puna e juaj është stamposur në faqet e para në mjaft revista prestigjioze. Kur ktheheni pas, si e kujtoni nisjen ?
Fillimi ka qenë tepër i vështirë. Bëja tre pune për të arritur që të grumbulloja të ardhura për të shkuar në shkollë.
Cilat janë sfidat më të vështira që keni hasur gjatë gjithë këtyre viteve rrugëtimi profesional?
Ndër vështirësitë e lidhura me profesionin janë udhëtimet e shumta për arsye pune në vende të ndryshme dhe koordinimi i fotografimeve në studion time private si edhe përpjekja ime për të ndihmuar çdo artist të ri shqiptarë.
Cilën do të veçonit si fotografinë më speciale tuajën, atë që mbart një histori a kujtim të veçantë për ju personalisht, emocionalisht?
Një ndër fotografitë më të veçanta që kam realizuar është një foto e Miss Albania , Hasna Xhukici dhe Miss Kosova Marigona Dragusha . Të dyja vajzat u kualifikuan në dhjetëshen e vajzave më të bukura në botë dhe Miss Kosova u vlerësua me vendin e dytë në këtë konkurs kaq prestigjioz të bukurisë femërore.
Çfarë është bukuria për Fadilin ? Subjektet që bëhen pjesë e fokusit tuaj, a është kusht që duhet të jenë domosdoshmërisht të bukura?
Mua më pëlqen bukuria klasike! Unë mendoj që çdokush ka diçka të bukur… dikush sytë, dikush qafen.
Sa mendoni se ka ndryshuar imazhi i femrës dhe koncepti i bukurisë ndër vite?
Besoj se bukuria klasike shkon e vjen, sikurse thonë ‘’class is forever’’ . Në këtë kohë koncepti i bukurisë është ekzotikja, por gjithmonë kthehet tek klasikja.
A e ka ndryshuar/influencuar teknologjia industrinë e fotografisë? Është ky një ndryshim pozitiv apo negativ?
Fotografia dixhitale ka ndryshuar artin e fotografisë e mendoj se ky ndryshim është pozitiv.
Ndërsa shikojmë gamën e fotografive duket se portreti është pika juaj e fortë. Sa e lehtë apo e vështirë është të depërtoni në personalitetin e personazhit, në brendinë e tij ?
Është e vështirë të depërtosh në personalitetin e personazhit, po është e rëndësishme të fitosh besimin e tyre në mënyrë që të nxjerrësh në pah më të mirën që ata njerëz kanë.
A është një personazh publik që ju dëshironi ta fotografoni, por ende nuk e keni bërë?
Mbase kam dëshirë të fotografoj Angelia Jolie, ajo është një fytyrë klasike për mua.
Cili është raporti që ruani sot me Shqipërinë dhe Kosovën? I vizitoni shpesh? Çfarë ju mban të lidhur fort pas vendit amë?
Kthehem shpesh sepse është pasioni për njerëzit e mi.
Zakonisht njerëzit që merren me art, krijimtari kanë një njohje e perceptim më të thellë të jetës sociale. Si e shihni ju sot gjendjen në Kosovë apo edhe në Shqipëri? Dua të them nga pikëpamja ekonomike, politike, sociale… Si është ‘fotografia’ e Shqipërisë dhe Kosovës në mendjen tuaj?
Shqipëria the Kosova kane avancuar shumë. Ka art kudo!
Cila është ambicia më e madhe e Fadilit në jetë, si njeri dhe si fotograf ?
Ambicia ime personale ka qenë të kisha mundësinë të hapja dyert për artistët shqiptarë, që t’i insipiroja ata me artin tim dhe mendoj se e kam arritur këtë gjë; në njëfarë mënyre jam bërë një rrugë lidhëse.
Sa albume fotografie numërohen në familjen Berisha? Si është raporti me fëmijët dhe bashkëshorten?
Mbase jo aq shumë sa duhet. Kam me shumë fotot të fëmijëve kur kanë qenë të vegjël. Kemi raport shumë të mire në familje.
Ju njiheni edhe si filantropist dhe merrni pjesë në fushata bamirësie. Mund të ndani me ne disa detaje më shumë rreth kësaj?
Gjithmonë jam gati të suportoj çështje të ndryshme, organizata kundër sëmundjeve të ndryshme. Bamirësia është e rëndësishme për mua. Gjithashtu e rëndësishme është t’i japësh kontributin tënd komunitetit njerëzor.
Burimi: STAR PEOPLE