Në një kohë që Shqipëria ka shtuar prezencën e saj në misionet ndërkombëtare, qeveria shqiptare ka shprehur dëshirën për të shtuar armatimin e saj. Aktualisht Shqipëria ka marrë disa automjete amerikane për transportim trupash që po përdoren në zonat e luftës ku vendi ynë është me misione.
Por sipas dokumentit të siguruar nga tirananews.al, në 2017 Dhoma e përfaqësuesve në Itali ka diskutuar edhe në lidhje me mundësinë e një kontrate shitjesh armatimi me vendin tonë. Bëhet fjalë për mjete Iveco të blinduara të lehtë dhe të mesëm.
“Në mënyrë të veçantë, në vitin 2014: Beretta u dha një kontratë për pistoleta PX-4, 20 pushkë snajperësh SAKO TRG-22 dhe 30 pushkë snajperësh SAKO TRG-42, Fiocchi iu dha një kontratë 3.5 milion për municione, Iveco shiti 4 VTLM-Lince në Policinë Ushtarake Shqiptare. Ministria e Mbrojtjes Shqiptare planifikon së shpejti të marrë armë të reja sipas standardete të NATO (5.56 mm), helmeta, jelekë antiplumb dhe pajisje mbrojtëse kundër kërcënimit bërthamor, biologjik dhe kimik (CBRN). Forcat e Armatosura Shqiptare gjithashtu shprehën qëllimin e tyre për t’u pajisur me mjete të blinduara të transportit që do të përdoren në operacionet ndërkombëtare për të zëvendësuar flotën aktuale të vjetëruar sovjetike. Ministria e Mbrojtjes Shqiptare po zhvillon një kërkesë për rreth 40 automjete të blinduara 8×8 (të armatosur me sisteme 30 mm ) dhe rreth 120 automjete të transportit të gjeneratës së fundit (lloji i lehtë, i armatosur me sisteme 12.7 mm).
Në dokumentin e përgatitur në parlamentin Italian është dhe analiza që ata i bëjnë vendit tonë, duke filluar nga ekonomia, funksionimi i institucioneve, marrëdhëniet me Italinë.
Por ajo që bie në sy është vëmendja që Italia i ka kushtuar raporteve mes Shqipërisë dhe Turqinë. “Shqipëria luan një rol të rëndësishëm në problemet që prekin Kosovën, ku 92% e popullsisë rezidente është e përkatësisë etnike shqiptare. Integrimi progresiv euro-atlantik i Ballkanit Perëndimor duket se favorizon një lehtësim të përgjithshëm të tensioneve në rajon. Në këtë drejtim, Presidenti turk ERDOGAN ka deklaruar në disa raste se Shqipëria luan një rol themelor në stabilitetin e rajonit dhe ka premtuar një fluks të vazhdueshëm investimesh në vend (rreth 3 miliardë dollarë)”.
Mbetet për t’u parë nëse Shqipëria do të blejë këtë sasi armatimi për shkak të COVID-19 apo do jetë e detyruar të tërhiqet. Pothuajse i gjithë Ballkani është futur në një garë të re armatimi.