Një goditje që të ndryshon jetën në mënyrën më të pamenduar. Ky është përshkrimi që të prekurit dhe familjarët e viktimave të COVID-19 japin sa herë që ndodh të biesh në kontakt me ta. E në një vend me shumë probleme si Shqipëria, shumë prej tyre denoncojnë se familjarët e tyre të vdekur për autoritetet kanë qenë vetëm numra. Burime për Dosja.al bëjnë me dije se gjatë kësaj jave, janë bërë tri denoncime për humbje të sendeve personale të personave të tyre të dashur që janë në trajtim e sipër në spitalet COVID.
Bëhet fjalë për dy raste denoncimi për humbje të telefonave celularë, ndërsa denoncimi i tretë është bërë për humbje të sendeve personale, mes tyre edhe të kartave bankare. Të njëjtat burime shtojnë se denoncimi është bërë në komisariatin numër 1., të policisë në Tiranë, ku e motra e një viktime të COVID-19 ka denoncuar humbjen e telefonit të vëllait të saj, i cili ishte ndarë nga jeta duke humbur luftën me COVID.
Motra kërkon kujtimin e fundit nga i vëllai, ku brenda telefonit gjenden foto, video e momente të tij. I njëjti denoncim është bërë edhe nga bashkëshorja e një viktime, e cila ka denoncuar se të shoqit i kanë humbur sendet personale përfshirë edhe kartën e bankës, e cila ishte e lidhur me llogarinë e pagës.
Protokolli i pacientëve që trajtohen në të trija spitalet COVID detyron që pacientët të mos përdorin telefona celularë gjatë periudhës që janë të shtruar në spital./ Dosja.al