Reperi amerikan, Travis Scott ka zhvilluar së fundmi koncertin e tij në “Coney Art Walls”, së bashku me reperin Meek Mill.
Teksa performonte në skenë, reperit amerikan iu desh të ndalonte shfaqjen e tij, kur vuri re disa fansa të veshur si Spider-Man, që po rrezikonin veten duke u ngjitur në shtyllat e ndriçimit, për një pamje më të mirë të shfaqjes.
31-vjeçari iu bëri thirrje fansave të zbrisnin nga shtyllat e ndriçimit, në mënyrë që të gjithë të mund të shijonin të sigurt performancën.
Sakaq, një zëdhënës i Travis ka bërë me dije se reperi amerikan, do të përpiqet që koncertet e tij të jenë sa më të sigurta që të jetë e mundur, në mënyrë që fansat të mund të argëtohen.
Kujtojmë se performanca e Travis Scott në Festivalin Astroworld vitin e kaluar u kthye në një tragjedi, ku mbetën të vrarë 10 persona dhe qindra të tjerë të plagosur.