Euro 2020 ka parë këtë fundjavë të mbyllen ndeshjet në Grupin A dhe të përcaktohet rrugëtimi për Italinë dhe Uellsin, dy skuadrat e para të këtij grupi. Italianët e dinë që tani se do të vihen përballë ekipit të dytë në Grupin C, ndërsa uellsianët me të dytën e Grupit B.
Por cilët janë emrat konkretë në varësi të renditjes aktuale të grupeve të tjera të Europianit, duke marrë për bazë edhe skuadrat të cilat aktualisht janë katër të tretat më të mira? Më poshtë janë të gjitha përballjet duke marrë për bazë situatën aktuale në të gjithë grupet, me vetëm Grupin A të mbyllur plotësisht, që do të thotë që këto çifte mund të përditësohen në 3 ditët në vijim, si duke reflektuar lëvizjet brenda grupeve, ashtu edhe atyre në renditjen e katër të tretave më të mira. Kjo pasi për shembull për momentin, me situatën aktuale, një ekip si Spanja do të ishte e pesta e tretë dhe nuk do të merrte pjesë në fazën me eliminim direkt.
Bie në sy se gjendja aktuale e grupeve do të dhuronte në 16-she një supersfidë për t’u shijuar plotësisht mes Holandës dhe Portugalisë,por edhe duele mes surprizash si Suedi-Austri apo Uells-Rusi. Megjithatë, rezultatet në këto tre ditë do të konfirmojnë emrat e tjerë që zyrtarizohen në këtë tabelë të 16-shes duke iu afruar më shumë asaj që do të jetë vijimësia e rrugëtimit të turneut.
