Bashkia e Shkodrës ka njoftuar sot për ndryshime të përkohshme në qarkullimin rrugor për shkak të shtimit të fluksit të lëvizjeve gjatë ditëve festive.
“Rruga “Besnik Sykja” që lidh sheshin Dervishaj me pedonalen rruga “28 Nëntori”, do të bllokohet nga ora 17:00 – 00:00, duke nisur që nga dita e sotme deri në datën 1 Janar 2025. Të gjithë qytetarët që frekuentojnë këtë segment rrugor, qarkullimi do të kryhet nga rruga “Babej” në drejtim të rrugës “Dragushej” e cila vijon trafikun drejt rrugës “Edith Durham” në sheshin “Perash”. Udhëtarët do të orientohen për lëvizjen e tyre nga efektivë të Policisë Bashkiake”, njofton Bashkia e Shkodrës.
Bashkia ka kërkuar mirëkuptimin e banorëve për këtë ndryshim, duke theksuar se masa synon krijimin e kushteve të sigurta për këmbësorët në këto ditë festive, ku Shkodra mbetet në qendër të vëmendjes së festimeve.
