Qindra fluturime në aeroportet më të ngarkuara të SHBA-ve po anulohen këtë fundjavë, ndërsa linjat ajrore po reduktojnë shërbimet për shkak të mbylljes së zgjatur të qeverisë. Siç shkruan Associated Press, deri tani, ngadalësimi i urdhëruar nga qeveria që nisi të premten nuk ka shkaktuar ndërprerje të mëdha, por ekspertët paralajmërojnë se situata mund të përkeqësohet, veçanërisht nëse anulimet shtohen me afrimin e Festës së Falenderimeve.
Ka shqetësime për ndikimin që kjo situatë mund të sjellë në qytetet dhe bizneset që varen nga turizmi, si dhe për vonesat në dërgesat e mallrave që mund të ndikojnë në furnizimin e dyqaneve me produkte festive.
Sa fluturime janë anuluar?
Në ditën e parë të ngadalësimit të urdhëruar nga Administrata Federale e Aviacionit (FAA), u anuluan mbi 1 mijë fluturime, sipas faqes FlightAware që ndjek ndërprerjet e fluturimeve. Të shtunën u anuluan mbi 800 të tjera, një ditë zakonisht më e qetë për udhëtime.
Jo të gjitha anulimet janë pasojë direkte e urdhrit të FAA-së, por numri pritet të rritet në ditët në vijim nëse situata vazhdon. FAA njoftoi se reduktimet do të prekin fillimisht 4% të fluturimeve në 40 aeroporte të përzgjedhura dhe do të rriten në 10% deri të premten.
Sekretari i Transportit, Sean Duffy, paralajmëroi se mund të nevojiten edhe më shumë anulime nëse mbyllja vazhdon dhe më shumë kontrollorë ajrorë mungojnë në punë.
Pse po anulohen fluturimet?
Kontrollorët ajrorë nuk kanë marrë paga për gati një muaj për shkak të mbylljes së qeverisë, çka ka çuar në mungesa të stafit dhe raportime se janë të sëmurë. Shumica e tyre po punojnë me orar të detyruar gjashtë ditë në javë pa pagesë, dhe disa janë detyruar të marrin punë të dyta për të përballuar shpenzimet, sipas Shoqatës Kombëtare të Kontrollorëve të Trafikut Ajror.
Si po ndikohen pasagjerët?
Shumë pasagjerë u lehtësuan kur panë që fluturimet të premten u zhvilluan kryesisht sipas orarit, dhe ata që u prekën arritën të ri-rezervojnë shpejt. Deri tani, fluturimet ndërkombëtare nuk janë prekur.
Megjithatë, pasiguria mbetet e lartë për fluturimet e ardhshme. “Nuk dua të mbetem në aeroport duke fjetur në një stol,” tha Michele Cuthbert nga Ohio, për fluturimin e saj drejt Dallas-it. Kompanitë e makinave me qira raportuan rritje të ndjeshme të rezervimeve njëdrejtimëshe, ndërsa disa njerëz po anulojnë fluturimet fare.
Cilat janë pasojat përtej udhëtimeve ajrore?
Së pari, ekziston rreziku për rritje çmimesh në dyqane, pasi gati gjysma e mallrave ajrore në SHBA transportohen në avionët për pasagjerë. Ndërprerjet e mëdha mund të rrisin kostot e transportit, të cilat do t’u kalojnë konsumatorëve, tha Patrick Penfield, profesor i logjistikës në Universitetin Syracuse.
Nëse ngadalësimi vazhdon, humbjet do të përhapen në të gjithë ekonominë, nga turizmi te prodhimi industrial. “Kjo mbyllje do të ndikojë gjithçka, nga avionët e ngarkesave te udhëtimet e biznesit dhe turizmi,” tha Greg Raiff, CEO i Elevate Aviation Group. “Do të prekë taksat e hoteleve dhe të qyteteve. Është një efekt zinxhir që do të ndihet gjerësisht.”