Një problem teknik ka shkaktuar fikjen e sistemeve të trafikut ajror në Shqipëri rreth orës 17:30 të ditës së sotme, 28 gusht. Pavarësisht situatës, trafiku ajror në hapësirën ajrore të vendit nuk është bllokuar.
Sipas Albcontrol, ekspertët kanë ndërhyrë menjëherë duke marrë të gjitha masat e nevojshme për të shmangur çdo rrezik të mundshëm për avionët që operojnë në hapësirën ajrore shqiptare. Paralelisht, ka nisur puna për rikthimin e sistemeve në funksion.
Rreth orës 18:00, 90% e sistemeve janë rikthyer në funksionimin normal, ndërsa ekipet vijojnë punën për rikuperimin e pjesës së mbetur.
Albcontrol bën me dije se reagimi në kohë dhe profesionalizmi i ekspertëve bënë të mundur shmangien e bllokimit të trafikut ajror në hapësirën ajrore të vendit.