Presidenti i Finlandës, Sauli Niinistö është shprehur me qëndrim zyrtar se vendi i tij ka vendosur të aplikojë për anëtarësim në NATO. Ndërkohë, ky vendim ka tensionuar raportet mes Helsinkit dhe Moskës.
Para pak ditësh, Kremlini kërcënoi me “hakmarrje tekniko-ushtarake”, duke theksuar gjithashtu një vendosje të mundshme të armëve taktike bërthamore pranë rajonit të Balltikut. Vetë presidenti rus, Vladimir Putin ia sqaroi presidentit finlandez pasojat e vendimeve të tij, që “Nuk ka asnjë kërcënim nga ana jonë për sigurinë tuaj, por hyrja juaj në NATO do të ndikojë vetëm negativisht në marrëdhëniet me Rusinë”.
Teksa nga Kievi Mikhailo Podoliak, këshilltari më i afërt i Presidentit Voldymyr Zelenski, flet për një NATO të destinuar të zërë rrënjë “në periferi të Shën Petersburgut”, ministri i jashtëm rus Sergei Lavrov akuzon Perëndimin se tani ka shpallur “luftë totale hibride kundër Rusisë”.
Ndërkohë në Gjermani krerët e diplomacisë së vendeve aleate janë thirrur për të përgatitur terrenin për zgjerimin e planifikuar.