Hoze Antonio Rejes u nda nga jeta pas një aksidenti tragjik pak javë më parë, duke tronditur botën e futbollit. Megjithatë, duket se ai ka lënë një trashëgimi futbollistike mbrapa, pasi djali i tij, Hoze Antonio Rejes Lopez, që tani është mes lojtarëve të perspektivës dhe sot ka firmosur për Real Madrid.
I ndjeri ishte në dijeni të kësaj firme, pasi i biri kishte kaluar me sukses testet në klubin ku ai ishte protagonist vetë për disa vite. Familja Rejes thjesht priste momentin e telefonatës për firmën, por gjithçka u shty pas tragjedisë së tmerrshme.
Sot djaloshi ka shkuar në ambientet e klubit ku ka nënshkruar kontratën për t’iu bashkuar skuadrës madrilene, pas viteve të fundit të kaluara në akademinë e Leganes. Të parët që e kanë përshëndetur sapo ai hodhi fotot e firmës në rrjetet sociale, ishin ish-kolegët e babait të tij, mes të cilëve edhe Cesk Fabregas.
“Lufto dhe mbi të gjitha mos ndal asnjëherë së besuari. Përulësi si gjithmonë, para të gjithave. Shumë fat kampion”, ishte mesazhi i Fabregas, një mik i ngushtë me babain e djaloshit.
