Mes tymit dhe flakës, në seancën plenare në Kuvend që zgjati vetëm më pak se 5 minuta, u miratua me 83 vota projektbuxheti 2024, pa debat dhe me votat e maxhorancës. Me nisjen e seancës, deputeti Flamur Noka ndezi flakadanë dhe u përjashtua.
Pasi mbërritën një orë para orës 10:00, kur është caktuar fillimi i diskutimit, deputetët e grupit të Rithemelimit morën karriget dhe i vendosën pirg në foltore.
Garda nuk ka lejuar Sali Berishën dhe Gazment Bardhin të zaptojnë podiumin ku ulet kabineti qeveritar dhe kryetarja e Kuvendit. Kjo ka krijuar edhe një moment tensioni, ku Bardhi dhe Ramadan Lika kanë shtyrë punonjësit e Gardës. Në Kuvend ka mbërritur edhe kryeministri Edi Rama.