Një situatë e pazakontë gati në gjendje emergjence është në Britani, për shkak të të nxehtit që mund të jetë edhe vdekjeprurës. Autoritetet u bënë thirrje qytetarëve të përmbahen nga përpjekjet për të shijuar rrezet e diellit, ndërsa për herë të parë parashikohet që temperaturat të rriten mbi 40 celsius.
Parashikuesit e motit në Britani, javën e kaluar, lëshuan paralajmërimin e parë të kuq” të të nxehtit ekstrem” për disa pjesë të Anglisë, të hënën dhe të martën. Zyrtarët janë të shqetësuar për efektet në shëndetin e njerëzve dhe në sistemin e kujdesit shëndetësor.
Kurse në Francën jugperëndimore flakët detyruan më shumë se 1500 njerëz të evakuojnë zonën, mes luftës së zjarrfikësve për të vënë flakët nën kontroll, teksa mbi 500 hektarë u dogjën.
Në Spanjë kanë shpërthyer dhjetëra zjarre, duke ndërprerë rrugët dhe duke detyruar mijëra njerëz të evakuohen nga shtëpitë e tyre pasi temperaturat e verës nuk treguan shenja uljeje, ndërsa lugina Jerte në Extremadura, ka qenë pika qendrore e zjarreve më të vështira ditët e fundit.
Italia po përjeton thatësirën më të keqe në 70 vitet e fundit që po përhapet në të gjithë vendin, me tharjen e lumenjve dhe rezervuarëve. Temperaturat javën që po nis pritet të arrijnë deri në 42 gradë celsius në shumë qytete italiane në veri të vendit.