Kanë kaluar më shumë se katër vite nga ajo ndeshje, por dueli mes Serbisë dhe Shqipërisë në Beograd vështirë se do të harrohet ndonjëherë dhe protagonistëve të ngjarjeve të turbullta të asaj nate u kërkohet vazhdimisht që të rikujtojnë momentet e sfidës që përfundoi shumë muaj në vonë në zyrat e KAS të Lozanës.
Protagonist absolut i asaj ngjarje ka qenë mbrojtësi Stefan Mitroviç. Futbollisti serb ishte ai i cili tërhoqi me forcë poshtë flamurin dhe dronin, duke nisur më pas përplasjen mes dy skuadrave e hyrjen e tifozëve në fushë që solli edhe braktisjen e ndeshjes. Në një intervistë për “France Football”, Mitroviç ka kujtuar edhe një herë çastet e asaj ndeshje të tetorit 2014 duke justifikuar gjestet e tij.
“E gjithë bota më pyet ende për të… Unë i kam respektuar të gjithë. Nuk ishte më çështje futbolli por politike. E gjitha që desha të bëja, ishte që të vazhdoja ndeshjen, nuk kam menduar asnjëherë për ndonjë gjë tjetër. Më pas, isha edhe më shumë i bindur se nuk kishte asgjë më tjetër në gjestin tim përveçse bezdisja që të shihja ndeshjen që ndërpritej. Nëse do të ndodhte përsëri, unë do të bëja të njëjtën gjë”, ishin fjalët e futbollistit serb në intervistën e tij.