Pika kufitare e Morinës po përballet me një fluks të lartë lëvizjesh, ndërsa qindra pushues nga Kosova dhe vendet e rajonit kanë zgjedhur bregdetin shqiptar për të kaluar pushimet verore.
Sipas të dhënave zyrtare, nga ora 20:00 deri në orën 08:00 të mëngjesit të sotëm, në këtë pikë kufitare kanë hyrë në Shqipëri 12 mijë e 642 shtetas të huaj dhe 1 mijë e 471 shtetas shqiptarë. Po ashtu, është regjistruar edhe një numër i lartë mjetesh, me 119 autobusë që kanë kaluar kufirin gjatë kësaj periudhe.
Ndërkohë, daljet nga Shqipëria kanë qenë dukshëm më të ulëta, me vetëm 1 mijë e 887 shtetas që kanë dalë gjatë 12 orëve të fundit.
Pushuesit shprehen se zgjedhin bregdetin shqiptar për çmimet e përballueshme, plazhet e pastra dhe afërsinë me Kosovën.
Pavarësisht fluksit të lartë, në pikën kufitare të Morinës nuk janë krijuar radhë, ndërsa procedurat e kalimit vijojnë normalisht, edhe si rezultat i marrëveshjeve për lehtësimin e lëvizjes mes Shqipërisë dhe Kosovës.