Forca ndërkombëtare shtesë po dërgohen në veri të Kosovës për të garantuar sundimin e ligjit. Përfaqësuesi i Lartë i BE-së për Politikën e Jashtme dhe Sigurinë, Josep Borrell tha se trupa të Forcës Evropiane të Xhandarmërisë, pjesë e karabinierëve italianë, kanë zbarkuar dhe do ta mbështesin përkohësisht EULEX-in.
“Në këto kohëra të tensionuara në Kosovë, misioni i BE-së për sundimin e ligjit EULEX përmbush detyrën që ka për të garantuar stabilitet: Forca Europiane e Xhandarmërisë, pjesë e Karabinierëve, mbërriti atje ne qëllim të përforcojë përkohësisht Njësinë Policore të EULEX-it. Ky mision do të vazhdojë të mbështesë një mjedis të sigurt”.
Kryesisht në pikën kufitare të Jarinjës është shtuar numri i pjesëtarëve të EULEX-it, pas tërheqjes së “Listës Serbe” nga të gjitha institucionet e Kosovës. Në Jarinjë janë dislokuar më së shumti policë nga kontingjenti polak, të cilët janë duke e ndjekur situatën nga afër.
Mes kësaj pike dhe Mitrovicës së Veriut, në rrugën kryesore janë stacionuar ushtarë të misionit paqeruajtës të NATO-s, KFOR. Disa orë më herët, edhe zëdhënësi i Departamentit Amerikan të Shtetit, Ned Price, gjatë një konferencë për media, tërhoqi vëmendjen për një përshkallëzim të mundshëm të situatës pas bojkotit të institucioneve të Kosovës nga serbët.