“CNN” shkruan se një djalë 11-vjeçar nga nga Zaporizhzhia, qytet në juglindje të Ukrainës, u konsiderua “një hero i natës” nga autoritetet sllovake. Kjo pasi djaloshi e kaloi vetë kufirin e Ukrainës për në Sllovaki.
“11-vjeçari mbante një çantë shpine, një qese plastike dhe një pasaportë dhe kishte një numër telefoni të shkruar në dorën e tij, sipas Ministrisë së Brendshme të Sllovakisë. CNN nuk mundi t’i verifikonte në mënyrë të pavarur këto deklarata. Ai erdhi i vetëm sepse prindërit e tij duhej të qëndronin në Ukrainë. Vullnetarët u kujdesën për të, e çuan në një vend të ngrohtë dhe i dhanë ushqim dhe pije”, deklaroi Ministria.
Deklarata, e postuar në faqen e Ministrisë në Facebook të shtunën thoshte se falë informacionit të shkruar në dorën e djalit dhe në një copë letre që ishte palosur në pasaportën e tij, stafi në kufi ishte në gjendje të binte në kontakt me të afërmit e djalit në Sllovaki, të cilët më pas mundën të vinin dhe ta merrnin.
“Ai i fitoi të gjithë me buzëqeshjen e tij, pa frikë dhe vendosmëri, i denjë për një hero të vërtetë”, thuhet në deklaratë. Është e paqartë pse djali ishte i pashoqëruar.
“CNN” nuk mundi të verifikonte në mënyrë të pavarur këtë rast individual, por më shumë se 1.2 milionë refugjatë janë larguar tani nga Ukraina që nga 24 shkurti, sipas OKB-së deri më 3 mars.
Nga rreth 1.3 milionë refugjatët që kanë ikur, shumica e tyre, 53,7%, kaluan në Poloni .
Të tjerë kanë shkuar në vende duke përfshirë Hungarinë, Sllovakinë, Moldavinë dhe Rumaninë.
