Sali Berisha si kurrë më parë, fjalën e tij në seancën e kësaj të enjte në Kuvend, po e mban live në Facebook, pasi kryetarja e seancës, Ermonela Felaj pezulloi për disa minuta seancën plenare, pasi kreu i PD-së e mori fjalën jashtë rregullores.
Pasi bllokoi Foltoren e Kuvendit, Berisha nxorri telefonin dhe u fut LIVE nga rrjetet e tij sociale, duke mbajtur një fjalim, e jo i vetëm, por ftoi edhe demokratët e tjerë. Meqë kishte fjalën dhe kohën e diskutimit sa të donte, kryedemokrati bëri akuza për disa nga ministrat e qeverisë së kryeministrit Edi Rama, duke u ndalur më shumë kohë tek Olta Xhaçka dhe Ulsi Manja.
“Afera nga më të pistat me të cilat kam me qindra telefonata. Flet në emër të vasalit të Vuçiç dhe Putin. E vërteta është se Rama është avokati numër 1 i Vuçiç dhe se vëllezërit Karriç janë bashkëaksioner me Ramën në Portin e Durrësit. Këto detyrojnë opozitën që të mbajë një qëndrim tjetër në parlament.
Ky parlament duhet të mos ekzistojë më, të marrë fund, ndaj se sot ju garantoj se do të jetë ditë në lartësinë e 12 nëntorit por ajo datë do të kalohet nga protesta të tjera të fuqishme para parlamentit, bota do e marrë vesh se hajdutët në pushtet janë të aftë të kryejnë çdo krim.
Këto janë të vërteta, fikeni sa të doni mikrofonin, po ja është mrekullia e Facebook, që të futem kudo. Unë ftoj, hapeni parlamentin, ja iku zonja Xhaçka, investitorja jonë. Ulusi je bërë famoz, vetëm 2 mushka kanë ngelur në fshatin tënd pa u punësuar. Të sjell këtu si binjak i Spiropalit”.
