Fëmijët e kopshtit “Zübeyde Hanım”, kanë dalë këtë të enjtë në një protestë para Kryeministrisë së bashku me prindërit e tyre. Ata kanë kundërshtuar urdhrin për mbylljen e kopshtit. Të ka munguar kopshti? “Po, dhe kalamajt. Nuk kam shkuar në kopësht. Jam mërzitur që nuk kam shkuar në kopësht. Më mungon zysha”,-tha një fëmijë.
“E dua kopshtin, si Zaho të vetin”, ishte një nga parullat në protestë, ndërkohë që fëmijët në formë simbolike janë vendosur me karrige e tavolina dhe vizatojnë. Një nga prindërit e fëmijëve të cilët ishin pjesë e kopshtit të Turgut Ozal, është përlotur ndërsa foli për vendimin e qeverisë të cilin e quajti të padrejtë.
“Nuk është normale. Nuk i rrezikohej jeta në asnjë moment fëmijëve, Unë jam ndër brezat e parë të Turgut Ozal dhe në asnjë mënyrë nuk jemi induktuar me fenë. Unë vetë jam e besimit ortodoks. Jam shumë e prekur, kjo nuk është normale. Studentët ekselentë, është e turpshme. Nuk e kisha menduar që fëmija im do të dilte sot në një protestë para Kryeministrisë. Janë fëmijë me medalje”.
Nga ana tjetër, vetë fëmijët edhe kanë pikturuar në muret e Kryeministrisë, si të ishin në kopshtin që qeveria ua mbylli.
Kurse një prind tha se ata edhe mund të ngrejnë një padi civile. “Në protestë kemi dalë sot për fëmijët e mi dhe të të gjithë Shqipërisë. Ne që jemi më larg nga Tirana nuk kemi mundësi ti çojmë fëmijët në kopshtet shtetërore që Rama na ka dërguar një listë. nuk mund ta çoj në një kopsht me kushte skandaloze ku në një krevat flenë tre fëmijë. Kam tre ditë që e mbaj fëmijën në shtëpi. Nuk kemi ndërmend të ndalemi me kaq. Shkolla po përpiqet të vijojë edhe me Strasburgun, ndërsa ne prindërit po mendojmë të nisim një padi civile si palë e tretë”.