Moti mjaft i nxehtë dhe periudha e pushimeve verore, nuk i ka ndalur investimet në qytetin e Burrelit dhe fshatrat e Matit. Në qytetin e Burrelit është në përfundim riasfaltimi i të gjitha rrugëve, ku u realizua ndërtimi i rrjetit të brendshëm të ujësjellësit. Falë kujdesit të kryebashkiakut Agron Malaj, qyteti i Burrelit ka tashmë infrastrukturë bashkëkohore.
“Përfundoi puna për riasfaltimin e rrugëve në lagjen “Pjetër Budi” dhe po vijon në rrugët e tjera të qytetit. Synimi ynë është që gjithë rrugët e qytetit të jenë të asfaltuara dhe sa më të aksesueshme për banorët”, shkruan kryetari i bashkisë Agron Malaj.
Me intensitet dhe cilësi është punuar edhe në rrugën “Qamil Gjika”, në afërsi të Muzeut Historik Mat. Kjo rrugë ishte gati e pakalueshme. Balta në dimër dhe pluhuri në verë ishin kthyer në makth për banorët e kësaj lagje. Sakaq përfundoi puna për asfaltimin e rrugës në fshatin “Batër e Vogël”. “Rruga ishte shqetësim madhor për banorët e zonës e cila ishte kërkuar prej vitesh. Investimi do të vijojë për të kryer lidhjen me fshatin Pjezë me të njëjtët parametra”, shprehet kryebashkiaku i Matit.
