Pas inspektimeve të djeshme në tre qarqet (Durrës, Shkodër dhe Lezhë) më të prekura nga moti i keq, këtë mëngjes kryeministri Edi Rama e ka nisur me një mesazh falënderimi për të gjithë ekipet e emergjencave të angazhuara në zonat e prekura nga reshjet e shiut dhe përmbytjet.
Përmes një postimi me foto në Facebook, kreu i qeverisë tregon përmes fotove punën në shërbim të komunitetit për të përballuar situatën. Reshjet e fundit të shiut kanë shkaktuar përmbytje në disa zona të vendit, ku më problematike situata i paraqit në qarkun e Shkodrës dhe të Lezhës.
“MIRËMËNGJES dhe me krenari e mirënjohje për të gjithë trupat e Ushtrisë, Emergjencave Civile, Policisë, punonjësit e OSHEE-së, Shëndetësisë, Bujqësisë, Bashkive, në zonat e prekura nga reshjet e larta, të cilët po tregojnë ditë e natë se sa përpara ka bërë shteti shqiptar në gatishmërinë për t’i shërbyer popullit, ju uroj të gjithëve ju një ditë të mbarë”,-shkruan Rama.