Tetë anëtarë të një bande shqiptare të trafikut të lëndëve narkotike, ku përpos trafikut të drogës, anëtarët ishin edhe autorë të disa grabitjeve të armatosura janë vënë pranga nga policia greke.
Mediat greke raportojnë se në pranga janë vënë Ardian Frroku, Elvis Gjergji, Kol Gjergji, Armando Filopati, Tonin Kola, Gentian Hinga dhe një grua rumune e quajtur Daniela Jordache.
Gjithashtu si pjesë e bandës është renditur edhe shqiptari Genc Pepa i akuzuar për vrasjen e biznesmenit Aleksandro Stamatiadhi, të ekzekutuar në prill të vitit 2018 gjatë një grabitjeje me armë në banesën e tij.
Mësohet se Hinga është me aftësi të kufizuara, pasi nuk ka një këmbë dhe një dorë, ndërkohë që dyshohet se luante rolin e shoferit për të larguar nga Greqia anëtarët e tjerë të bandës.
Policia greke i ka vënë në pranga shqiptarit në sajë të operacionit ‘Derri i egër’ për shkak se Genc Pepa kishte dobësi ndaj derrave.
Ka qenë pikërisht fotoja e një derri të egër dhe armës që vrau biznesmenin grek, e publikuar nga Pepa në Facebook, ajo që dërgoi në arrestimin e shqiptarit.
Pepa u arrestua në Belgjikë dhe u ekstradua drejt Greqisë, ndërkohë kalimin në shtetin e kishte bërë me anë të një karte identiteti të falsifikuar.
Policia greke thotë se ai ka kuptuar që autoritetet greke e kishin identifikuar dhe e kishin vënë në vëzhgim, ndaj arriti të largohej në Belgjikë, me destinacion final Britaninë e Madhe.
Autoritetet bëjnë të ditur se Pepa ka qenë në banesën e viktimës në kohën që ai është qëlluar, madje sipas bashkëshotes së viktimës ka qenë ai, që qëlloi 3 herë me çifte mbi viktimën.
Po ashtu Pepa është dënuar më parë për trafik klandestinësh dhe ishte prej kohësh nën mbikëqyrjen e autoriteteve greke për aktivitete të paligjshme. Ai pritet të ekstradohet gjatë muajit të ardhshëm në Greqi, ku do të përballet me akuza tepër të rënda.