Kryeministri Edi Rama ndodhet në një vizitë zyrtare pune në Emiratet e Bashkuara Arabe ku merr pjesë në Samitin Botëror të Veprimit të Klimës COP28. Kreu i qeverisë ka ndarë pamje teksa pritet në Dubai nga Sheikh Mohammed bin Zayed Al Nahyan, President i EBA dhe Antonio Guterres, Sekretari i Përgjithshëm i OKB-së. Rama po ashtu ka pasur takim edhe me presidentin e Këshillit Europian, Charles Michel.
Presidenca e COP28 fokusohet në arritjen e rezultateve, përmes një agjende, për të transformuar angazhimet dhe premtimet në përparim të prekshëm në adresimin e krizës klimatike. Kjo përfshin ofrimin e një përgjigjeje gjithëpërfshirëse dhe vendimtare për të kontribuuar në ridrejtimin e botës në rrugën e duhur për veprimin e klimës. Sipas OKB, Toka tani është më e ngrohtë me rreth 1,1 gradë Celsius se sa ishte në shekullin e 19-të.
Qëllimi i Marrëveshjes së Parisit është të parandalojë që temperatura globale të kalojë 1,5 gradë mbi nivelet paraindustriale, pasi ky konsiderohet si kufiri për të shmangur pasojat më të këqija të mundshme të ndryshimeve klimatike.
