Prezantohen uniformat e reja të Kombëtares
Federata Shqiptare e Futbollit, ka prezantuar ditën e sotme, uniformat e reja me të cilat ekipi kuqezi do të luajë edicionin e eliminatoreve të Europianit 2020.
Uniforma që do të mbajnë veshur portierët, është pothuajse e njëjtë, me ngjyrë jeshile, dhe disa shirita të zi të vegjël, në pjesën e shpatullave. Ndërkohë, edhe tutat e portierit janë ngjyrjë jeshile.
Edhe uniforma e dytë dhe e tretë, në thelb janë të njëjta. E dyta, do të jetë e bardhë, me një jakë të zezë, si edhe tutat e bardha. Ndërsa, e treta do të jetë tërësisht e zezë, me tutat dhe getat gjithashtu të zeza.
Ndërkohë, uniforma e parë do të jetë e kuqe, me një jakë të zezë, ndërsa tutat do të jenë të zeza, e getat në ngjyrë të kuqe. Ndërkohë, risia e sponsorit “Macron”, këtë herë konsiston në figurën e vendosur përpara të tre llojeve të fanellave.
Aty është e ndërtuar një shqiponjë, pak a shumë si në fanellat e Euro 2016, por tashmë në një formë paksa më të çrregullt dhe abstrakte.
I çuditshëm fakti që, edhe pse ekipi kuqezi gjendet në Shqipëri, i grumbulluar para ndeshjes me Turqinë, për të bërë prezantimin e këtyre fanellave, FSHF ka ftuar modele e modelë, dhe nuk ka marrë protagonistët kryesorë që do t’i mbajnë veshur, me qëllimin për të prekur edhe një herë tjetër Europianin.
