Vijojnë protestat në disa qytete të Francës, pas vrasjes së një adoleshenti nga ana e policisë teksa nuk iu bind një urdhri për të ndaluar makinën. Protesta e mbrëmshme ishte edhe më e madhe dhe më e dhunshme ku në disa raste u rrezikua dhe jeta e banorëve të thjeshtë. Në Naterres, manifestuesit i printe nëna e 17 vjeçarit Nahel e cila kërkonte drejtësi për djalin e saj.
Autoritetet u angazhuan për të përballuar cdo situatë të mundshme. Më shumë se 40 mijë policë u dislokuan në rrugë, teksa transporti publik u pezullua pas orës 21:00. Në rrethinat e Parisit u vendos dhe gjendja e shtetrrethimit.
Trazira gjithashtu u regjistruan në qendër të Parisit, ku të paktën njëqind njerëz me fytyrën e mbuluar plaçkitën dyqanet e qendrës tregtare Les Halles. Sipas Le Figaro, e cila citon burime zyrtare, më shumë se 255 persona u arrestuan në të gjithë vendin gjatë natës.