Analisti Frrok Çupi vlerëson se PD zyrtare ka shansin që të provojë veten me zgjedhjet e pjesshme në Kukës që pritet të mbahen në shtator.
Në një intervistë për Abcnews, analisti theksoi se nëse humb sërish në një bashki që konsiderohet bastion demokrat, duhet të kalojë nëpër një reformim.
“PD ka pasur disa shanse. Ky është një shans për të provuar edhe momentin ku e gjen mazhorancën të rrëzuar përtokë, në pikën më të vështirë të qeverisë ndërhyn fati i PD-së për të provuar veten në një betejë. Në Kukës, ku PS pësoi një disfatë të pamerituar sepse ishte personale dhe ku kjo zonë ka qenë gjithmonë bastion i PD-së.
Nëse PD e të gjitha llojeve në këtë rast përsëri humb në Kukës, kjo është një dëshmi që duhet të mblidhet për të kaluar një reformë ose një zhvillim tjetër brenda vetes sepse do të thotë se nuk mund të fitojë as në momentet më të vështira të kundërshtarit”, theksoi analisti Çupi.
Ndër të tjera, ai theksoi se qëllimi aktual i Lulzim Bashës është largimi i Sali Berishës nga PD dhe politika shqiptare.