Drilon Lleshi është arrestuar nga policia në kufi. 23-vjeçari tentoi të kalonte kufirin në doganën e Qafë Prushit, duke pasur të fshehur në mjetin e tij një 17-vjeçare. Policia kufitare zbuloi pas kontrollit të imtësishëm në bagazhin e mjetit “Benz”, 17-vjeçaren e fshehur. Ajo po tentonte të kalonte kufirin në mënyrë të paligjshme falë ndihmës së 23-vjeçarit. Policia arrestoi në flagrancë Lleshin rezident në Londër, si dhe proceduan në gjendje të lirë një 17-vjeçar, banues në Kosovë.
Njoftimi i plotë
Në PKK Qafë Prush, në hyrje të RSH, shërbimet e Policisë Kufitare, në vijim të punës për goditjen e krimeve ndërkufitare, si rezultat i kontrolleve me përzgjedhje, kanë kaluar në vijë të dytë për kontroll më të imtësishëm, automjetin tip “Benz”, me drejtues shtetasin D. LL dhe me pasagjer një 17-vjeçar.
Gjatë kontrollit në bagazhin e automjetit, u gjet e fshehur një shtetase e mitur 17 vjeçe, e cila tentonte të kalonte kufirin në mënyrë të paligjshme, përmes ndihmës (transportimit) të dhënë nga shtetasi D. LL. dhe 17-vjeçari.
Në përfundim të veprimeve procedurale, specialistët për Hetimin e Krimeve në DVP Kukës arrestuan në flagrancë shtetasin D. LL., 23 vjeç, rezident në Londër, si dhe proceduan në gjendje të lirë 17-vjeçarin, banues në Kosovë, për veprën penale “Ndihma për kalim të paligjshëm të kufirit” dhe shtetasen e mitur për veprën penale “Kalimi i paligjshëm i kufirit shtetëror”