Kampionati shqiptar vazhdon të dhurojë skena nga më të çuditshmet dhe interesant është fakti se shpesh herë ka incidente të përsëritura, e megjithatë mungon marrja e masave nga FSHF.
Ndeshja Vllazia-Teuta u ndërpre dy herë gjatë ditës së sotme, ndërsa stadiumi u zhyt në terr. Shkëputja e energjisë elektrike gjatë takimit sportiv u prit me thirrjet “Rama ik” nga disa prej tifozëve të pranishëm.
Pak javë më parë, dritat u fikën edhe në takimin mes Tiranës dhe Teutës në “Selman Stërmasi” dhe si për ironi të fatit edhe sot i ndodh sërish Teutës.
Pas asaj jave, Federata vendosi të mos licenconte asnjë stadium për të zhvilluar ndeshjet gjatë orëve të mbrëmjes për shkak se shumë stadiume nuk plotësonin kushtet për të luajtur. “Loro Boriçi” dhe “Elbasan Arena”, ishin dy stadiumet e vetme të cilat plotësonin kushtet dhe ka qenë pikërisht “Loro Boriçi”, ai që ka nxjerrë blof FSHF-në.
Klubet i ofruan garanci Federatës se kanë biseduar me drejtorinë e shpërndarjes së energjisë dhe nuk do të ketë më probleme të tilla. Gjithsesi, dritat janë fikur sërish dhe tani mbetet të shihet se si do të reagojë FSHF për këtë.