Bernardino Gonzalez Vazquez është Shefi i ri i Arbitrave në Federatën Shqiptare të Futbollit. Në ambientet e Shtëpisë së Futbollit, spanjolli bëri prezantimin e tij në rolin e ri, ku zëvendëson Sokol Jarencin e larguar.
Në fjalën e tij, Gonzalez Vazquez falënderoi presidentin e FSHF-së, Armand Duka, për mundësinë dhe theksoi se synon të përdorë eksperiencën e tij për të përmirësuar arbitrimin në Shqipëri.
“Nuk jam këtu për të folur për veten. Dua të flas për eksperiencën time në arbitrim. Nuk e di se si do të jetë në të ardhmen. Nuk i dihet asnjëherë çfarë ndodh. Unë vij me dëshirë dhe entuziazëm për këtë sfidë të re për mua. Nuk është e lehtë të lësh përgjegjësitë dhe jetën time në vendin tim, por kam dëgjuar fjalë të mira për këtë federatë dhe kjo është pikë kyçe për mua.”
Ai tha se do të fokusohet te puna me arbitrat dhe zhvillimi i tyre i vazhdueshëm.
“Dua të shoh nga afër si funksionon arbitrimi. Ka shumë talente këtu. Propozimi im është i thjeshtë: të përmirësojmë arbitrat çdo ditë. Siç themi në Spanjë: sa më shumë punë bëj, aq më shumë fat kam. Kjo është një pikë që mund ta bëjmë më mirë. Do të jem një prej jush dhe do të bëjmë më të mirën.”
Gonzalez Vazquez premtoi gjithashtu se do të punojë fort për të rritur besueshmërinë e arbitrimit, duke kërkuar edhe bashkëpunimin e medias, lojtarëve dhe trajnerëve.
“Nuk e di çfarë sjell e nesërmja. Di që arbitrat mund të bëjnë gabime, sepse janë njerëz. I kërkoj edhe medias bashkëpunimin. Janë shumë aktorë në lojë, lojtarët dhe trajnerët. Ndonjëherë harrojmë se duhet të jemi shembull për të tjerët. Duhet të japim shembull për të rinjtë. Mund të premtoj dy gjëra: të punoj fort dhe të jap besueshmëri. Kënaqësi të jem këtu. Shumë faleminderit.”