Kryeministri Edi Rama tha për Politico së fundmi se Shqipëria nuk do ta vazhdojë më bllokimin e TikTok-ut. Sipas tij, takimet me platformën e mediave sociale kanë rezultuar të kënaqshme dhe është krijuar një partneritet, i cili pritet të bëhet publik në javët ose muajt në vijim.Edhe pse mendonte se reagimi i TikTok-ut do të ishte tërësisht tjetër pas vendimit fillestar për të bllokuar platformën, Rama u shpreh i befasuar prej tyre.
“Sepse në fillim, për shkak se ishte normale të mendonim se ata do të na luftonin, ata do të hakmerreshin ndaj nesh, ata do të na ngacmonin. I takova vetë dhe mbeta shumë i impresionuar nga qëndrimi i tyre. Ata po i dëgjonin me shumë kujdes pikat tona.”
Në Shqipëri, u vendos ndalimi i TikTok-ut në mars të vitit 2025 pas rreth një viti bisedimesh mbi abuzimin online. Goditja fatale me thikë e 14-vjeçarit Martin Cani jashtë shkollës, ishte një ndër arsyet kryesore pse qeveria urdhëroi ofruesit e shërbimeve të internetit të bllokonin aksesin në këtë aplikacion.
Ky veprim shkaktoi reagime nga partitë opozitare dhe OJQ-të, të cilat e konsideruan vendimin si censurë të fjalës së lirë. Sa i takon rezultatit të këtij vendimi, kryeministri u shpreh: “Ka qenë efektiv në ndërtimin e kësaj marrëdhënieje me TikTok dhe në sjelljen e disa masave mbrojtëse që nuk ekzistonin”.