Shqipëria dhe Kosova do të jenë së bashku në Bordin e Paqes për administrim e Gazës si shtete anëtare themeluese. Pasi kryeministri Edi Rama iu përgjigj pozitivisht ftesës së presidenti amerikan Donald Trump, Këshilli i Ministrave ka miratuar sot marrëveshjen për aderimin e Shqipërisë në Bordin e Paqes.
Tashmë do të jetë Kuvendi i cili do të ratifikojë nesër marrëveshjen duke e votuar nesër në një seancë plenare jashtë radhe. Mediat kanë zbardhur edhe marrëveshjen e miratuar nga Këshilli i Ministrave.
Misioni i Bordit të Paqes është ushtrimi i ndikimit për vendosjen e themeleve të paqes, stabilitetit dhe rindërtimit në territore të prekura nga konflikti, në përputhje me të drejtën ndërkombëtare dhe dispozitat e Kartës së tij themeluese.
Karta e Bodrit të Paqes garanton sovranitetin e të gjithë shteteve anëtare dhe se mandati është 3-vjeçar. Nga kjo e fundit përjashtohen ato shtete që do të kontribuojnë në shumën 1 miliardë dollarë brenda vitit të parë nga anëtarësimi.
Të enjten, në Davos të Zvicrës ku ka nisur forumi ekonomik, pritet të zhvillohet ceremonia për Bordin e paqes për Gazën. Presidenti amerikan Trump dëshiron që bordi të ratifikohet zyrtarisht nga liderët botërorë gjatë një ceremonie të posaçme në kuadër të Forumit Ekonomik.
Sipas Agjencisë italiane ANSA deri paraditen e së mërkurës në total për Bordin e paqes janë dërguar 52 ftesa pa marrë parasysh Kosovën. Pjesmarrjen në bord e kanë pranuar 8 shtete, Shqipëria, Argjentina, Hungaria, Kazakistani, Uzbekistani, Maroku, Vietnami dhe Emiratet e Bashkuara arabe.