Presidenti rus Vladimir Putin ka refuzuar ofertën e homologut ukrainas Volodymir Zelensky për t’u takuar ballë për ballë, duke thënë se aktualisht nuk shihte asnjë arsye për ta bërë një gjë të tillë.
Shefi i Kremlinit tha se letra e Zelenskyt ishte pjesërisht e pahijshme dhe nuk dukej si një ofertë e sinqertë për të zhvilluar bisedime.
“Kjo letër përmban disa vërejtje mjaft të pahijshme. A ishte një mënyrë për të krijuar kushtet për një takim ballë për ballë apo një mënyrë për të mos caktuar një takim ballë për ballë? Mendoj se ishte e dyta”.
Në letrën e dërguar ditën e sotme, Zelensky i bënte thirrje Putinit, për takim në një vend neutral për t’i dhënë fund luftës.
“Ne shohim se Shtetet e Bashkuara janë plotësisht të përqendruara te çështja e Iranit dhe do të ishte gabim të presim derisa lufta në Evropë të kthehet sërish në qendër të vëmendjes. Ukraina propozon dhënien fund të kësaj lufte përmes angazhimit të drejtpërdrejtë mes nesh dhe jush. Unë po propozoj një takim”.
Në një takim me median ndërkombëtare një ditë më parë, Putini i qëndroi besnik qëndrimit të tij të ashpër ndaj luftës dhe tha se trupat e tij po përparonin në fushën e betejës çdo ditë. Por ai tha gjithashtu se propozimet e Presidentit amerikan për paqe mund t’i jepnin fund luftimeve, nëse Kievi ishte gati për kompromis.
Të dyja palët akuzojnë njëra-tjetrën se refuzojnë të bëjnë kompromis.