Të nxehtit përvëlues që ka përfshirë vendin tonë duket se po i vjen fundi. Sipas meteorologëve një front i ftohtë me origjinë nga Oqeani Atlantik do të depërtojë sot Gadishullin Ballkanik, gjë që do të sjellë ulje të temperaturave.
Gjatë depërtimit të frontit, priten shtrëngata shiu me breshër dhe kjo vjen si pasojë e temperaturave të larta dhe kontaktit me ajrin e ftohtë.
Sonte rrebeshe të fuqishme shiu do të përfshijnë shumë pjesë të Sllovenisë dhe Kroacisë, kurse gjatë natës rrebeshet e fuqishme të shiut me vetëtima dhe bubullimë do të avancojnë në drejtim të Bosnjës dhe Hercegovinës dhe Serbisë.
Ky front i të ftohtit pritet të vijë dhe në Kosovë, Mal të Zi, Shqipëri dhe Maqedoni sot vonë pasdite duke shkaktuar prishje të motit me rrebeshe shiu me vetëtima, bubullimë dhe mundësi edhe për breshër.
Pas këtij fronti priten ulje të theksuara të temperaturave dhe kjo do të jetë fundi i valës së fuqishme të nxehtësisë tropikale.