Me mbërritjen e 340,000 dozave të “Coronavac”, numri i vaksinave tejkalon 1 milion të tilla të siguruara nga Shqipëria deri tani.
Përkatësisht, numri i vaksinave të mbërritura kundër koronavirusit ka arritur në 1, 578, 790.
Ministrja e Shëndetësisë, Ogerta Manastirliu ka reaguar përmes një statusi në rrjetin social “Facebook”, ku shkruan se fushata e vaksinimit nuk do të ndalet, por me ditët e hapura të vaksinimit masiv do të intensifikohet vaksinimi anti-Covid.
Po ashtu, Manastirliu thekson se me uljen e fashës së vaksinimit, do të krijohet mundësia për mbrojtjen e të gjithë qytetarëve.
Statusi i plotë
Lajm i mirë
340,000 doza të vaksinës ‘Coronavac’ sapo kanë mbërritur në Aeroportin ‘Nënë Tereza’, sasia më e madhe e mbërritur njëherësh në Shqipëri, që e çon në 1,578,790 numrin e vaksinave të mbërritura deri tani.
Do të intensifikojmë vaksinimin anticovid, me ditët e hapura të vaksinimit masiv, vaksinimin derë më derë dhe uljen e fashës së vaksinimit, duke u dhënë mundësi sa më shumë qytetarëve të vaksinohen dhe të mbrohen nga Covid-19.