Prej kohësh Serbia është në një fushatë për të çnjohur Pavarësinë e Kosovës. Presidenti Aleksandër Vuçiç, pretendon se nëntë shtete kishin tërhequr njohjen e Kosovës dhe se Beogradi ishte në pritje të një shteti të dhjetë. Diplomati Agim Nesho, thotë se tërheqjet e njohjes nuk kanë asnjë vlerë pasi plani franko-gjerman finalizohet me njohje reciproke.
“Serbia ka kohë që ka thënë se 10 vende do të tërheqin njohjen. Mendoj se nuk ka një problematikë të tillë, pasi ne jemi përpara një akti, të një propozimi konkret të projektit franko-gjerman, i cili jo vetëm do të arrijë normalizimin e marrëdhënieve, por në fund të tij do të ketë edhe njohjen reciproke të dy shteteve.
Projekti franko-gjerman i tejkalon të gjitha veprimtaritë e shteteve siç është Serbia, e cila tenton të tërheqë njohjet. Bota është bërë multipolare dhe gjeopolitika po sundon.
Rusët janë shumë të interesuar dhe njohja e Kosovës, që në fillim, është përdorur nga rusët si një procedent. Ata menjëherë pas njohjes së Kosovës nga Perëndimi kanë kërkuar që dy zona të Gjeorgji të kishin të njëjtën njohje”, tha Nesho.