Gara në Premier Ligë për titullin ka marrë fund edhe zyrtarisht, nëse kush kishte më dyshime. Liverpuli e ka siguruar sot matematikisht titullin pas 3 dekadave pritje, pasi ka parë nga TV se si Çelsi ka mundur Mançester Sitin që e ndiqte në distancë në vendin e dytë.
Pakkush kishte dyshime që skuadra e Klop nuk do ta mbyllte edicionin duke ngritur lart trofeun e shumëpritur, por siguria matematike e bën më mbresëlënëse arritjen e saj duke llogaritur se ka edhe 7 ndeshje për t’u luajtur deri në mbylljen e kampionatit anglez.
Çelsi sot dominoi përballë kampionëve në fuqi, duke shënuar e para me Pulishiç dhe duke kërkuar me ngulm golin që do të mbyllte sfidën. Por De Bryjn hapi duelin duke barazuar me goditjen e dënimit në fillimin e pjesës së dytë dhe Sterling më pas goditi shtyllën. Megjithatë, në minutën e 78 erdhi momenti vendimtar, kur Uilian transformoi me saktësi penalltinë e shkaktuar nga Fernandinjo pas një prekje topi me dorë në zone. Mesfushori i Sitit mori edhe të kuq duke bërë kësisoj më të thjeshtë punën e Çelsit që të administronte rezultatin dhe të merrte një fitore që kishte shumë vlerë në Liverpul, por edhe për londinezët.
Ata tashmë kanë 5 pikë diferencë nga Mançester Junajtid dhe Ullvërhempton që e ndjekin dhe duan t’i rrëmbejnë vendin e katërt që mban aktualisht skuadra e Frenk Lampard, një distancë sigurie që duhet ruajtur me çdo kusht në javët e fundit.