Ligjvënësit në Gambia do të votojnë këtë të hënë legjislacionin për heqjen e ndalimit të gjymtimin gjenital të femrave, gjë që do ta bënte vendin e Afrikës Perëndimore vendin e parë që e bën këtë.
Gjymtimi gjenital femëror është emri i dhënë për të gjitha procedurat që përfshijnë heqjen e pjesshme ose totale të organeve gjenitale të jashtme femërore për arsye tradicionale, fetare ose të tjera. Rrethprerja rituale e femrave është një problem në shumë pjesë të botës, kryesisht në Afrikë, dhe pasojat e një akti të tillë janë të përjetshme.
Mund të shkaktojë gjakderdhje të rëndë dhe madje edhe vdekje, dhe vajzat zakonisht i nënshtrohen procedurës midis fëmijërisë dhe adoleshencës. Në afat të gjatë, kjo mund të çojë në infeksione të traktit urinar, probleme menstruale, dhimbje, ulje të kënaqësisë seksuale dhe komplikime në lindje, si dhe depresion, vetëbesim të ulët dhe çrregullim të stresit post-traumatik.
Jaha Doukureh, themeluesja e një grupi lokal që synon t’i japë fund praktikës, ‘Safe Hands for Girls’, i tha Associated Press (AP) se ajo është e shqetësuar se ligjet e tjera që mbrojnë të drejtat e grave mund të shfuqizohen.
Propozimi për ndryshimin e ligjit mbështetet nga konservatorët fetarë në vendin me shumicë myslimane. Teksti i ligjit thotë se ai “kërkon të ruajë pastërtinë fetare dhe të mbrojë normat dhe vlerat kulturore të shoqërisë.” Organi më i lartë islamik i vendit e quajti praktikën e gjymtimit gjenital “një nga virtytet e Islamit”.