Puna e gazetarit është të hulumtojë për të gjetur fakte dhe lajm, dhe ndoshta gazetari holandes Daniel Verlaan ka qenë duke kërkuar për këtë kur ka gjetur kodin e takimit dhe ka hyrë online në një mbledhje sekrete të ministrave të mbrojtjes së BE-së.
Mediat e huaja shkruajnë se ai ka arritur të futet falë informacioneve të publikuara në llogarinë në Twitter të Ministrisë së Mbrojtjes së Holandës.
Në videon e shpërndar, shfaqet gazetari Daniel Verlaan i televizionit RTL në ekranin e madh të videokonferencës, ai si fillim rregullon flokët dhe më pas i përshëndet ministrat me dorë duke buzëqeshur. Sakaq, edhe shefi i Politikës së Jashtme të BE Josep Borrell, ka buzëqeshur, por më pas e ka vënë atë në dijeni se ishte futur në një konferencë sekrete dhe mund të arrestohej.
“A e di se je futur në një konferencë sekrete. E dini që është vepër penale, hë? Më mirë dilni nga konferenca, përpara se të vijë policia,”- i ka thënë Borrell, duke qeshur.
“Po, po. Më vjen keq. Unë jam gazetar nga Holanda. Më vjen keq që ju pengova në konferencën tuaj”, ia ktheu gazetari.