Shqiptarë vijojnë të ankohen për tarifat mujore të kompanive telefonike. Sipas tyre, çmimet e larta të ofertave e bëjnë të vështirë përdorimin e rrjetit telefonik, ndërsa mungojnë dhe kontrollet.
Denoncimi i radhës vjen nga gazetari i News 24, Osman Stafa i cili ka sjellë rastin e tij personal me kompaninë Vodafone.
Postimi i plotë
VODAFONE është kthyer në një kompani shumë të madhe abuzuese. Këtu patjeter ndikon mospasja e konkurrencës në treg. Teksa bëja një ofertë mujore, para disa vitesh, në shumën 16 mijë lekë, në gjysëm të muajit, më mbaronte interneti, edhe pse shumicën e kohës qëndroja me wi-fi. Kështu duhet të bëja ofertë shtesë, që më shkonte diku tek 25-50 mijë lekë muaji. Gjeta një zgjidhje të një kontrate 1 vjeçare që ofronte Vodafone me 20 mijë e ca qindarka, me internet pa limit. E bëra atë, dhe në përfundim të kontratës, të njëjtin shërbim, me veç gjoja rritjen e shpejtësisë së internetit duhet ta merrja me 21 mijë e 600 lekë. Kaloi përsëri një vit, dhe këtë ofertë sot e marr me 23 mijë e ca qindarka.
Përveç kësaj, muaji gusht më erdhi me një faturë prej 31 mijë e ca qindarka. Ku i harxhova?
Interesohem, dhe më thonë se ato janë harxhuar se unë paskam përdorur shërbimin roaming.
Ku e paskam përdorur unë? Unë nuk kam dalë jashtë Shqipërisë në muajin gusht? Unë shkova me pushime në jug, në Himarë dhe në Livadh dhe më pas në veri në Theth dhe në Lumin e Shalës.
Pse të jesh në Livadh dhe Himarë, qënkë jashtë shtetit që t’u aktivizonka Roaming? Kjo është vjedhje e pastër që u bëhët klientëve, dhe pamundësia për alternativa, na bën që të paguajmë faturat dhe të shpresojmë që edhe në Tiranë mos të na aktivizohet shërbimi Roaming.
Po patjetër Together we can!!!
