Gazetari Ylli Rakipi ka komentuar mbrëmjen e sotme humbjen e radhës së Partisë Demokratike në 6 Mars, në të cilat PD doli forcë e tretë për herë të parë në historinë e saj.
Ai u shpreh se e vetmja mënyrë për të ngritur PD-në është të largohet Basha, madje edhe duke e marrë zvarrë nëse nuk largohet vetë.
“Mund të mos ketë zgjidhje, mbyllet Partia Demokratike fare. Pse duhet të ketë zgjidhje patjetër?! Pse ne këtu do ta rregullojmë këtë punë?! Nuk ka opozitë, mund të shkojë Shqipëria si pjesa dërrmuese e Evropës Lindore, në autoritarizëm. Pra, ashtu si e kanë bërë të tjerët Fevzi…
Dhe unë që të flas ty dhe ti që më flet mua, ne jemi shoqëri e stisur për këtë punë dhe të bëjmë marifete të tilla që të mos e ndërtojmë këtë sistem. Nuk e ndërtojmë dot, shkojmë drejt autoritarizmit dhe mbetemi vend autoritar. Do të rrijë Edi Rama sa të dojë, deri në plakjen e tij të vonshme, mund të vijë i biri i tij dhe të gjithë këta të vazhdojnë Luli Basha. Por të gjithë këta bashkë kanë një konkluzion: Tani ka ardhur momenti që Luli Basha të merret zvarrë, largohet nga aty, të hapet procesi, të mbushet Partia Demokratike, të hyjnë të gjithë njerëzit dhe të fillojë gara, por jo me këta njerëz që ishin”, tha Rakipi.