Akuza të forta ka hedhur gazetari Kujtim Draçini ndaj kryetares së Bashkisë Shkodër, Voltana Ademi. Ai shprehet se ajo nuk ka bërë asgjë për qytetarët gjatë gjashtë viteve, nuk ka mbajtur lidhje me PD-në, madje shkon më tej kur thotë se këto vite duhen shënuar me shirit të zi.
“E turpshme t’u drejtohesh qytetarëve shkodran me mesazhin e lamtumirës. 6 vite në “drejtim” nuk të pa askush njëherë në këmbë në rrugët e qytetit, nuk prite askënd, nuk bëre asnjë fushë sporti, asnjë korsi biçikletash, asnjë banjo publike, asnjë metër lulishte, nuk furnizove me ujë qytetarët, shpërdorove thellë me pastrimin e qytetit, nuk furnizove me ngrohje shkollat dhe kopshtet, largove nga puna qytetarët demokratë, të përndjekur politik”, shkruan Draçini.
Ai shton se Ademi do të kujtohet si shpërdoruese e fondeve publike. “Do të mbahesh mend si drejtuesi më i dobët që pas 1912 në bashkinë Shkodër. Periudhë jote prej 6 vitesh duhet shënuar me shirit të zi si në bashkitë kur drejtoheshin nga komunistët”, thotë gazetari.
