Gazment Bardhi ka komentuar ditën e sotme në një emision televiziv rikthimin e ish-Presidentit Ilir Meta në politikën aktive.
Sipas Bardhit, ndryshimi i emrit nga LSI në Partia e Lirisë nuk do të ketë ndikim në frymën opozitare që supozon Meta të sjellë pasi mungon në vend.
“Nuk ka asnjë surprizë në rikthimin në politikën aktive të Metës. Vetë e kishte njoftuar se pas përfundimit të mandatit si President do ti kthehej jetës aktive politike. Nuk shikoj që të paktën sa i përket aksionit opozitar, të ketë ndonjë ndryshim thelbësor nga ndryshimi i emrit nga LSI në ‘Partia e Lirisë’”, tha Bardhi.
Bardhi tha se LSI nuk ka qenë asnjëherë parti e theksuar majtas dhe kjo sipas tij u vërtetua në zgjedhjet e 25 prillit kur nuk pranoi koalicionin me PD, por bëri të kundërtën e asaj që thoshte. Në vend që të trokiste në dyert e të zhgënjyerve nga PS, shkoi tek ata të PD, pretendon Bardhi.
“Nuk ka qenë ndonjëherë e theksuar majtas LSI. Është krijuar në 2004 si degë e PS, por pas 2009 kur ishte në koalicion me PD, gjithmonë target i saj nuk ka qenë dobësimi i Ramës por i PD dhe gjithmonë ka synuar elektorat të PD. Kjo është vërejtur edhe në zgjedhjet e fundit, dhe pse kishte tendencë për të dalë me dy lista të veçanta me arsyetimin politik se do të merrnin vota të socialistëve të zhgënjyer. Ajo që u pa në terren ishte se trokiste për të marrë votën tek demokratët”, tha Bardhi.
Sa i përket akuzave të Metës për Bashën që e cilësoi si tradhtar të kauzës opozitare dhe të blerë nga Rama, Bardhi thotë se PD ka kërkuar gjithmonë që t’i përgjigjej me aksion aktit të qeverisë që prishi marrëveshjen e 5 qershorit.