Ai është jo vetëm nga këngëtarët më të pëlqyer të muzikës “live”, por edhe ndër më të kërkuarit nëpër dasma. E kur kërkesat për të qenë pjesë e gëzimeve familjare janë të shumta, edhe situatat e çuditshme janë pjesë e tyre.
Kështu i ka ndodhur Genës, teksa ka performuar në një dasmë në Tetovë.
“Ishim me vonesë. Në dasmë këndonte një grup tjetër, ndërsa ne ishim të ftuar specialë”, tregon Gena.
“Në vrap e sipër me organistin, futemi në dasmë dhe bëmë gati veglat. Teksa përgatiteshim, merrnim dhe shumë duartoktritje nga salla, që njëkohësisht thërrisnin emrin tim. U gëzova sepse normalisht e ndieva veten të vlerësuar”, kujton këngëtari.
“Pasi mbarova këngën e parë dhe nis të dytën, i them grupit muzikor që këndoi para meje për emrin e të zotit të shtëpisë, nëse quhej Agron”.
– Jo, – më tha ai. – Agroni e ka dasmën nga ana tjetër.
“Aty kuptova që kisha ngatërruar dasmën dhe ata më mirëkuptuan”, përmbylli me të qeshura këtë episod të sikletshëm Gena.