Ikona e muzikës dhe artit italian, Gianni Morandi, ka zgjedhur këtë verë hotelin “La Brisa”, një nga më luksozët dhe më të bukurit në bregdetin e Jugut të Shqipërisë, për të kaluar pushimet. Ky destinacion i veçantë, i njohur për komoditetin maksimal dhe peizazhin unik, është zgjedhur edhe nga shumë yje botërore.
Morandi u shpreh i mahnitur nga bukuria e rivierës shqiptare dhe nga mikpritja e shqiptarëve.
“Mes shqiptarëve dhe italianëve ka një lidhje shumë të fortë. Ka një lidhje muzikore, pasi janë shumë të pasionuar pas muzikës së viteve ’60, ’70 dhe ’80. Shumë miq të mi italianë vijnë këtu. Një mik i imi në Bolonjë më tha: ‘Shko për pushime në Shqipëri, sepse është një vend shumë i bukur’,” u shpreh këngëtari italian.
Ai shtoi se është impresionuar nga larmia e peizazhit që ndërthur detin me malet dhe se do të rikthehet përsëri në Shqipëri.
“Besoj se do të rikthehem edhe herë të tjera, siç do të rikthehen edhe shumë italianë këtu,” tha Morandi.
Gjatë qëndrimit të tij në Dhërmi, artisti u takua edhe me kryebashkiakun e Himarës, Vangjel Tavo, i cili theksoi rëndësinë e këtij destinacioni për turizmin italian.
“Është fundi i gushtit dhe mijëra italianë zgjedhin Himarën e Dhërmiun për pushime. Këtë herë kemi kënaqësinë të kemi mes nesh legjendën Gianni Morandi, i cili është shumë i kënaqur me kushtet që ofron Shqipëria,” tha Tavo.