I quajtur sot në Kuvend nga kryeministri Edi Rama “gjel deti i Peqinit”, deputeti demokrat Dashnor Sula i është përgjigjur përmes një postimi në Facebook. Sula shkruan se Rama përdori këtë fjalor rruge në Kuvend për të zhvendosur vëmendjen nga buxheti 2023, që sipas tij pasuron oligarkët e tij, për të zhvendosur vëmendjen nga kthimi në burg i ish-deputetit socialist Alqi Bllao e nga afera e Portit të Durrësit.
“Kryeministri me ministra e deputet në burg bën moral në Parlament. Për të zhvendosur vëmendjen e rikthimit të deputetit të tij në kokërr të burgut për aferën e inceneratorëve. Për të zhvendosur vëmendjen nga votimi dhe rezultati qesharak i kalimit me procedurë të përshpejtuar të marrëveshjes që i vjedh qytetarëve të Durrësit pronat.
Për të zhvendosur vëmendjen nga një buxhet që pasuron klientët e qeverisë dhe zero rritje për pensionistët. Kryeministri erdhi sot në parlament me një fjalor rruge, një fjalor që do ta kishin zili edhe ata kriminelët që ndajnë qelinë me ministrat dhe deputetët e tij. “Të mbaruar, të pafytyrë. Dërr-Dërr. Bedela. Laxhore lagjesh”, kjo ishte fjala e Ramës”, shkruan Sula.