Gjendet në Tiranë gruaja e zhdukur para disa ditësh në Berat. 37-vjeçarja nga fshati Samaticë në bashkinë Dimal e shpallur e humbur nga familjarët 3-ditë më parë është gjetur në Tiranë.
Ajo është identifikuar në rrugën e Kavajës, bazuar në fotografinë që familjarët kishin depozituar në DPV Berat ditën e martë, kur edhe denoncuan humbjen e saj.
37-vjeçarja M. Bega është sjellë në ambientet e Policisë së Beratit, ku pas takimit me familjarët është transportuar drejt Spitalit Psikiatrik në qytetin e Vlorës. Mësohet se 37-vjeçarja vuante nga probleme të shëndetit mendor dhe mospërdorimi i rregullt i medikamenteve e bënte atë agresive. Familjarët denoncuan zhdukjen e saj ditën e martë, të frikësuar se mos tentonte të dëmtonte veten apo të tjerët, si shkak i ndërprerjes disa ditore të medikamenteve të saj.