Gjermania ka krijuar një aleancë me Italinë dhe disa vende të Europës Lindore që kundërshtojnë heqjen e planifikuar nga qarkullimi të motorëve me djegie të brendshme deri në vitin 2035. Këto vende kanë gati propozimin e tyre.
Ministrat e transportit nga Republika Çeke, Gjermania, Italia, Polonia, Rumania, Hungaria dhe Sllovakia u takuan për të diskutuar ndryshimet në planet e Bashkimit Europian. Ministri gjerman i transportit, Volker Wissing, u shpreh se propozimi në fjalë ka nevojë për ndryshime urgjente.
Wissing shtoi se skepticizmi për heqjen graduale të automjeteve me djegie të brendshme u mbështet nga Italia, Polonia dhe Republika Çeke, ndër të tjera. Ai shtoi se grupi i vendeve dëshiron një kategori të veçantë të makinave me motor me djegie të brendshme që mund të funksionojnë me lëndë djegëse sintetike, neutrale ndaj karbonit, pas vitit 2035.
Sipas tij heqja nga qarkullimi i motorit me djegie, kur ai mund të funksionojë në një mënyrë neutrale ndaj klimës, duket një qasje e gabuar.
Ligji për CO2, mjeti kryesor i BE-së për të përshpejtuar kalimin e Europës drejt automjeteve elektrike, u pezullua në fillim të këtij muaji pas kundërshtimit të minutës së fundit nga Gjermania. Kjo i habiti politikëbërësit në Bruksel dhe shtetet e tjera anëtare, pasi vendet e BE-së dhe Parlamenti Europian kishin rënë dakord tashmë për një marrëveshje mbi ligjin vitin e kaluar.