Shtatë vjet pasi Gjermania hoqi rekrutimin e detyrueshëm në ushtri, shefi i saj i mbrojtjes Eberhard Zorn tha se punësimi i shtetasve të BE-së është “një opsion” për të mbushur vendet e ekspertëve, si mjekët apo specialistët e IT-së.
Inspektori i përgjithshëm i ushtrisë Zorn tha se forcat duhet “të shihnin në të gjitha drejtimet në një kohë kur mungon personeli i kualifikuar”, siç janë mjekët dhe specialistët e IT-së.
Gjermania synon të rrisë ushtrinë e saj me 21,000 persona deri në vitin 2025. Gjithashtu ka premtuar të rrisë buxhetin e saj të mbrojtjes nga 1.2% në 1.5% të prodhimit të brendshëm bruto deri në vitin 2024, përballë kritikave të Presidentit Donald Trump se nuk përmbush objektivin e NATO-s prej 2% të PBB-së.
Ministrja e Mbrojtjes, Ursula von der Leyen, tha në një intervistë të enjten se 182,000 ushtarë në uniformë ishin të punësuar nga ushtria, një rritje prej 6500 ushtarësh në dy vjet. Brenda shtatë viteve, kjo shifër duhet të arrijë në 203,000.
Gjenerali Zorn i tha grupit të gazetave Funke se “sigurisht që Bundeswehr-i ka nevojë për personel” dhe ushtria duhej “të shtynte fort për një brez të ri të përshtatshëm”, edhe pse qytetarët e BE në uniformë ishin “një opsion” që duhej të shqyrtoheshin vetëm në fusha të specializuara.
Sipas ligjeve të pas Luftës së Dytë Botërore, ushtarët në ushtrinë gjermane duhet të jenë gjermanë.
Komisioneri i parlamentit për forcat e armatosura, Hans-Peter Bartels, tha se rekrutimi i shtetasve të BE-së ishte tashmë një “lloj normaliteti”, pasi shumë ushtarë kishin dy shtetësi ose prejardhje emigrantësh.